Ĉinlando reduktos sian kreskocelon en la nova kvinjarplano, laŭ la ekonomikistoj

Antaŭ kunveno, kies kerna tasko determinos la disvolvovojon de Ĉinujo dum la venontaj kvin jaroj, ĉinaj ekonomikistoj atendas, ke la politikistoj mallevu la celon de kreskado de la malneta enlanda produkto (MEP) kaj tenu ĝin sub 5 elcentoj, aŭ eĉ forigu la laŭkvantan celon, ĉar la dua plej granda ekonomio en la mondo preparas forlasi sian kreskomodelon difinitan laŭ kvanto por emfazi strukturan kaj kvalitan plejbonigon por la venontaj jaroj, kiuj povus esti “la plej malfacilaj”.

La Politika Buroo de la Centra Komitato de la KPĈ kunvenis lunde por pripensi raporton pri konsultoj de la publika opinio pri dokumento pri la formulado de la 14-a kvinjarplano (2021-2025) por ekonomia kaj socia disvolvado kaj pri la celoj por 2035.

La dokumento, reviziita surbaze de la opinioj esprimitaj dum la kunveno, estos submetita por diskutado al la kvina plenkunsido de la 19-a Centra Komitato de KPĈ en Pekino de la 26-a ĝis la 29-a de Oktobro. La gvidantoj volas diskuti kaj aprobi la planon de ekonomia kaj socia disvolvado de Ĉinjo por la jaroj 2021 ĝis 2025.

La celo de kresko estis unu el la plej diskutataj elementoj de la antaŭaj kvinjarplanoj.

Kadre de la 13-a kvinjarplano finiĝanta ĉi-jare, Ĉinujo starigis mezan jaran kreskocelon de 6,5 elcentoj aŭ pli. La celo anoncita en la 12-a plano (2011-2015) estis 7 elcentoj.

“Ĉinujo certe malaltigos sian celon pri kreskado de la MEP ĉi-foje, inter nova disvolva fazo kaj kompleksa ekstera ĉirkaŭaĵo. Estas racia adopti pli malaltan celon nun, kiam Ĉinio transiris al kreskomodelo enfokusigita al novigado kaj investado”, diris Lian Ping, direktoro de la Investesplora Instituto, marde al Global Times. Zhixin.

“Kreskocelo de 4,5 elcentoj estas tute ebla”, diris Hu Qimu, altranga esploristo ĉe la Sinosteel Ekonomia Esplora Instituto.

“Ankaŭ eblas, ke Ĉinujo ne anoncas kreskan celon, ĉar politikaj decidantoj ŝanĝis sian filozofion, rapida kresko ne plu estas la simbolo de forta ĉina ekonomio”, diris profesoro Wang Yiwei. ĉe la Universitato Renmin-Lernejo pri Internaciaj Rilatoj de Ĉinio, al la Global Times marde.

“Ĉinio ne starigis kreskocelon ĉi-jare, montrante, ke Pekino eble finis sian 6-elcentan 'sojlon' kaj nun serĉas plibonigi centran konkurenckapablon kaj krei laborpostenojn, kadre de longa ekonomia transiro”, klarigis profesoro Wang.

En Majo, Ĉinujo eliminis sian kvantigitan kreskocelon por 2020, unua en kelkaj jardekoj, pro la peza efiko de la koronvirusa krizo.

La lando pruvas sian kapablon elteni kontraŭventojn ĝis nun. En la dua trimonato, la ĉina ekonomio kreskis je 3,2 elcentoj, post 6,8-elcenta kuntiriĝo en la unua trimonato. Ĝi ankaŭ montras la profundan fortikecon de sia ekonomio meze de tutmonda malkresko, en tempo kiam la COVID-19-pandemio haltigis la plej multajn ekonomiojn.

La Monda Banko antaŭvidis kreskon de 2 elcentoj ĉi-jare por Ĉinujo, danke al publikaj elspezoj, fortaj eksportadoj kaj la malalta rapideco de novaj kazoj de koronviruso ekde Marto. La resto de la orienta Azio kaj Pacifika regiono atendas recesion de 3,5 elcentoj.

“Se la tutmonda pandemio baldaŭ estos superita, ni havas ĉiujn kialojn kredi, ke la MEP de Ĉinujo povas kreski je 8-10 elcentoj en 2021”, diris Lian.
 

La pivota momento

Analizistoj vidas la defiojn kaŭzitajn de la kreskanta disiĝo inter Ĉinujo kaj Usono kaj de la pandemio COVID-19 kiel la komencon de malfacila provo por la ĉina ekonomio.

“Ĉinujo alfrontos kolosajn malfacilaĵojn dum la venontaj 10 ĝis 15 jaroj. La intensiĝo de la ĉinaj-usonaj disputoj, la riskoj de reapero de la pandemio kaj la tutmonda ekonomia malrapidiĝo prezentos defiojn al ĉina ekonomia disvolviĝo kaj igos la 14-an Kvinjarplanon pli grava ol iam ajn”, diris Lian.

Faktoroj rilataj al Usono, kiel rimedoj por prepari la landon al intensa luktado, povus kalkuli ĝis 30 elcentoj de la nova plano, Hu diris, rimarkante, ke Ĉinujo bezonas prepari sin por intensa luktado longtempe kontraŭ la usona subpremado kaj ĝia minaco de disiĝo.

La fokuso estos sur ducikla disvolva modelo kaj forta politika subteno por la altteĥnologia sektoro, eĉ se tio reprezentas tre altajn kostojn baldaŭ, kaj ankaŭ pri plua malfermo, laŭ S-ro. Lian.

La jaroj 2021 ĝis 2025 estos kritika mejloŝtono por Ĉinujo, kiel evoluanta lando, en siaj klopodoj proksimigi sin al la ekonomioj de evoluintaj landoj kaj fermi la breĉon inter si kaj Usono, la plej granda ekonomio de la mondo.

Tian Yun, vicdirektoro de la Pekina Ekonomia Operacia Asocio, diris marde, ke se Ĉinujo pliigos sian MEP je 1 biliono da dolaroj jare dum la venontaj 15 jaroj, Vaŝingtono havos neniun elekton krom forlasi sian komploton kontraŭ Pekino.

“Se ni atingos MEP de 30 miliardoj da dolaroj en 2035, ni povus havi enlandan merkaton duoble pli grandan ol Usono. Kun ekonomio konstruita sur internaj faktoroj, ni povos forpuŝi usonan agreson unu post la alia”, Tian rimarkis.

Lin Yifu, honora dekano de la Nacia Lernejo pri Disvolvado de la Pekina Universitato, antaŭdiris, ke la MEP de Ĉinujo superos tiun de Usono antaŭ 2030, surbaze de la kurzoj, kaj povus esti duoble pli alta ol tiu de Usono antaŭ 2050.

Alia decida aspekto de la kvinjarplano estos alporti la ceterajn miliardojn da ĉinoj al la meza klaso, diris analizistoj.

Sendepende de la internacia kaj enlanda situacio, Ĉinujo iĝos altenspeza lando kun averaĝa MEP pokape super la sojlo de 12 700 dolaroj, se la lando konservos sian strategian direkton kaj liberigos sian kreskokapablojn, diris Lin. .

“Se Ĉinujo sukcesos 'postvivi', tio estas konservi 4-elcentan kreskon dum la venontaj kvin ĝis dek jaroj, ĝi povos alfronti eblajn eksterajn defiojn kaj superi la mezan enspezon”, diris Lian.
Sekvu China.org.cn ĉe Twitter kaj Facebook por aliĝi al la konversacio.
 

Elfrancigita el french.china.org.cn (titolo: "La Chine réduira son objectif de croissance dans le nouveau plan quinquennal, selon des économistes") de Vilhelmo Lutermano, 2020-10-04